旅發局要員考察景點迎遊客重臨

旅發局近期為旅客重臨而做好準備，總動員喺1個月內實地考察全港大約150個景點同遊客設施。黛安收到風，旅發局主席彭耀佳同總幹事程鼎一（Dane）都有份參與，佢哋分別視察咗赤柱同深水埗，更同黛安分享小秘密。

彭主席話，以往成日同太太去赤柱拍拖，今次以旅客身份重遊舊地，發現赤柱多咗份藝術味，又多咗打卡位，連海傍公共洗手間都乾淨咗，仲形容赤柱好似充滿異國風情嘅小區。佢建議可以喺景點加設QR code，特別係秘點，旅客只要掃一掃就可以了解景點嘅故事，一定可以加深旅遊體驗。

Dane就話，深水埗區內多咗唔少文青小店進駐，同原有舊建築、露天市集、布藝店舖共存，睇落好有特色。佢仲話，旅遊事務署已經推出「城市景昔」應用程式，只要掃描區內指定地點嘅AR時鐘，就可以欣賞360度歷史全景圖像，增添旅途趣味！

原文網址：旅發局要員考察景點 迎遊客重臨